Rusak sakalasan

Kada lawas imbah baridarnya
pilim-pilim purnu nang gigir
dipandirakan di tipi, di SMA
Sambang Lihum kakanakannya
pina malain-lain kalakuan.
Pukuknya bila takumpulan pasti kada jauh pamandiran
pada nang carubu tu. Rupanya
pilim tu baidar juwa di
sakulahan. Siapa lagi mun kada
Utuh Kumandrah nang tukang
idar. Nang rusaknya lagi di padang babinian, pukuknya
antara sarik wan kagum wan
artis idulanya. Rancak juwa
babinian ne katahuan mahayal
rahatan balajar di kalas. Takisah hari itu palajaran
biulugi nang diajari Guru Apur.
Guru Apur ne urangnya anum,
tapi hanyar saminggu kawin.
Imbah masuk ka dalam kalas,
lalu Guru Apur ne betakun wan murid-muridnya. “Nah anak-
anak, kira-kira bagian tubuh
mana yang dalam keadaan
terkena rangsangan akan
otomatis membesar, bahkan
hingga 10 kali lipat?” Gigir kalas, apalagi padang
babinian. “Aaaaah bapak,
joroknya pang tatakunan!”
ujar Aluh Dangkik nang
langsung manjawab imbah
tatakunan tadi kaluar. Mandangar sasahutan Aluh
Dangkik Guru Apur diam haja
sambil manahani kurihing,
“Ada lagi nang handak
bapandir?” jar Guru Apur
pulang. “Enggih…. bapak jorok
banar!” jar si Enor pulang
matan balakang baucap. “Nah am, kaeni haja, siapa
nang satuju mun bapak
jorok?” takun guru Apur
nang langsung dikuriaki
kakanakan,
“Huuuuuuuuuuuuuuuuu….!” Sunyaan kakanakan babinian
maangkat tangan. “Nah, kanapa maka
babiniannya haja nang
meangkat tangan, mana
lakiannya?” jar Guru Apur. “Kami paham haja Pa ae,”
jar Utuh Ujai manyahuti mulai
balakang. “Paham napa, Jai?” “Pian hanyar kawin pang,
supan mun ulun
manyambat,” jar Utuh Ujai
kukurihing. Malihat kalakuan kakanakan
kaetu wan jawapan nang pina
maaneh, jadi tapaksa guru
Apur banahap manjalasakan.
“Kaeni, buhan kam ne talalu
tinggi antena, jadi bapa bingung, kanapa samingguan
ne pamandiran bagian kam
pina caramaian wan carubu
banar? Dangarakan baik-baik.
Partama, bearti bagian kam
malam tadi kada balajar sama sakali. Organ tubuh nang bapa
takuni tadi adalah PUPIL MATA
nang bisa baganal bila
langsung takana rangsangan
barupa surutan sinar. Makanya
mata bagian bisa riplik manutup saurangan bila
takana sinar atawa banda
lain.” “Huuuuuuuuuuuuuuuuuu…..!!
jar kakanakan pulang. “Nang kadua, khusus
babiniannya kanapa maangkat
tangan samuanya, baarti
pikirannya carubu sunyaan
atawa siap handak kawinan.
Nah, nang katiga, ngini nang paling panting. Jaka organ
tubuh nang sasuai wan
bayangan ikam tadi penis,
parcayalah: kada pacangan
nyaman mun buhan kam
kawin kaina. Bayangkan 10 kali lipat baganalnya, bisa-bisa
sarak samalaman ja.” “Huuuuuuuuuuuuuu……!!!”
jar kakanakan lakiannya riuh
manawakan babiniannya.